الثلاثاء، 17 أغسطس 2010

أنا عايزة اتجوز .. مش أنا لا



تعليقًا على مسلسل عايزة أتجوز في ناس بتقول ان المسلسل مزودها وأنه مبين ان البنات مدلوقة وحاجات ده

بالعكس المسلسل واقعي جدا وجسد أكبر معاناة بتبقة فيها البنت في مجتمعنا المُبجل

مجتمع بحمل البنت لوحدها مسئولية انها تتجوز و ان عدم جوازها ده مشكلة وانها لازم تتصرف

وده واضح في كل حلقة لحد دلوقتي .. كام مرة بيتقال لها ..اتصرفي !! كام مرة بنت اتخرجت واشتغلت سمعت الكلمة دي ؟؟

وتسمع الكلمة دي كل شوية ومن كل الناس على اختلاف الافعال المستخدمة

اتصرفي .. مشي حالك .. انتي هتفضلي كده كتير ؟؟ !! ما تتصرفي

طيب يعني هي البنت هتعمل ايه ؟؟

تضطر انها تستحمل انها تقف في طابور عرض او انها تظهر في المناسبات عشان الناس تشوفها

انها تقف في طابور قدام واحد عشان ينقي كأنه في سوق الجواري

أو طابور عرض قدام واحدة عايزة تنقي لابنها

ويارييييييييت في الاخر بيبقة عاجب

إلا ان البنت دايما تفضل تسمع كلمة

ا ت ص ر ف ي

تلاقي البنت نفسها بقت بين شقي الرحى ..

تقدم تنازلات ..

تعمل حاجات عمرها ما كانت مقتنعة بيها أصلا

بس عشان الناس تسكت .. بس عشان الناس تبطل تقول لها اتصرفي .. بس عشان الناس تبطل تبص لها نظرة شفقة أو شماتة أو أي نظرة ملهاش لازمة .. ملهاش غير معنى واحد

ياعييييييييينييييييي قاعدة لحد دلوقتي من غير جواز

ناس بتقول ان المسلسل بيّن أن البنات مدلوقة

لا البنات مش مدلوقين ولا حاجة .. بس المجتمع اللي زنقهم .. حطهم في سباق مع الزمن .. مفيش في ايديهم حاجة يعملوها

لكن الناس مبقاش عندها ايمان بالقدر

النااااااااااس

هي ي المشكلة الحقيقية .. ان الناس مفيش وراها حاجة غير الكلام .. الكلام المُحبط

اتصرفي .. شوفي البنات بتعمل ايه واعملي زيهم !! ؟؟

ده قدر ياناس قدر يا بشر

المسلسل نجاحه في انه عبر عن مشكلة دايما الناس بتعمل نفسها مش واخدة بالها منها بشكل صريح

وفي نفس الوقت كومدي

نيجي بقة للطرف الآخر من القضية

سبع البرومبة المبحوث عنه

البنت بيبقة كل تفكيرها هدفها الجواز .. هدف مشروع .. لاهو عيب ولا حرام

الجواز حق بيولوجي لكل الكائنات الحية

لكن بقة اللي مش مشروع

واحد يسمح لنفسه يدخل البيوت ويتفرج على بنات الناس لمجرد التسلية واهو ياكل جاتوه

وبعد كده يخلع بأي تلكيكة .. أصلها قصيرة .. اصل عييها مش ملونة .. أصلها مثقفة .. أصلها مش شبه مامتي .. أي تلكيكة لانه اصلا مفيش أي جدية في نيته

ويقوم يرجع الكلام للبنت تاني ان المشكلة فيها هي .. هي اللي معجبتش

ومن النماذج دي كتير .. في مجال الشغل عشان البنات تخلص له شغله مثلا ولا ساندوتشات ولا أي مصلحة لانه فاهم نوايهن ايه

ويفضل الضغط كله على البنت انها لازم تتصرف

انها لازم تكون بلاعة ... ايوة بلاعة

بلاعة مفتوحة توقع .. بس متوقعش أي حد .. توقع عريييييييس

وإلا تسمع جملة ما انتي اللي خايبة مش عارفة توقعي لك واحد

المشكلة كلها عند الناس .. الناس لازم يكون عندها ايمان بالقدر اكتر من كده ..

بالنسبة للبنت ..

لازم يبقة عندك قناعة داخلية ورضا تااااااام عن نفسك

وأي حد يقولك اتصرفي

تردي بمنتهى الثقة : أنا مش ناقصني حاجة وراضية جدًا عن حياتي واللي ربنا كاتبهولي ربنا هشوفه

وللحديث بقية مادام في العمر بقية ان شاء الله

هناك 4 تعليقات:

  1. بصى يا بطوط انتى اتكلمتى فى كذا نقطه فخلينا نناقشهم واحده واحده
    *** كون ان المسلسل صور البنات مدلوقين .. فده حقيقى ومش حقيقى البنت فعلا زى ما قلتى غصب عنها لو تغاضت عن احتياتجها لشريك حياه وشخص ترتبط فيه فالمجتمع مش هيسمحلها بده
    البنت بتبدأ ت...شعر بخطر العنوسه مع اقترابها من التخرج
    وبالتالى بيبقى هاجسجواها وشاغلها الشاغل الحصوب على شريك حياه

    *** من الحاجات العجيبه كمان واللى بيقحم بيها المجتمع حياه البنت اتهامها بأنها المسؤله وانها هى اللى لازم توجد الحل السحرى للحصول على شريك الحياه ده
    طوال سنين عمرنا اهالينا زرعوا جوانا الحدود فى التعامل ممنوع العلاقات والتباسط مع الجنس الآخر ما الى آخره ....
    وفى المقابل وقت ما البنت بتبدأ تكون مؤهله لسن الجواز بيبدلوا كل اللى اتربينا عليه بمصطلحات من قبيل مشى نفسك واتصرفى
    عملا بمبدأ " الغايه تبرر الوسيله "" !!!!

    *** موضوع بقى عريس الغفله اللى حاسس انه ملك زمانه ومفيش منه كتير _ مش لانه عريس لقطه طبعا وللكن لانه على رأى هند صبرى العدد شاحح D: _فده بيخليه يسمح لنفسه يعيش دور شهريار وينقى ويختار ويرفض دى ويطلع القطط الفطسانه فى دى
    فأخ نسى ان على رأى هند صبرى برضهان العينه مضروبه :D
    وان دلوقتى فى ازمه زواج للبنات مش لان مفيش عرسان لكن لان مفيش عرسان مناسبين
    وعلى فكره ده اللى بتحاول د/غاده عبدالعال توضحه فى المسلسل
    المشكله يا جماعه مش مشكله بنت عايزه تتجوز ولكن بنت عايزه تتجوز صح
    تتجوز شخص مناسب ليها لانها مش مجبره تقدم تنازلات وترضى بأى حد من منطلق ضل راجل ولا ضل حيطه
    البنت دلوقتى بتتعلم وتشتغل وليها كاين اجتماعى ومادى مستقل
    احتياجها لاكبر دلوقتى فى شريك الحياه انه يكون شريك لحياتها بجد يشاركها اهتمامتها وتفكميرها ويتفق مع طباعها وشخصيتها
    اكبر بكتير من احتياجها لكيان مادى ينفق عليها
    وهو ده اللى خلق ازمه الزواج من وجهها نظرى
    البنات اللى تأخر سن الزواج بيهم محصلش ده معاهم لانهم ملقوشواحد يبص فى وشهم ياحرام ولكن لانهم شافوا كتير ولحد دلوقتى مبقوششخص يناسبهم بجد

    وكفايه كده بقى يا بطوط علشان انا رغيت كتير D:

    ردحذف
  2. الله
    اكثر من رائع
    مع إشمئزازى الشديد من أداء هند صبرى المبالغ فيه
    ولكن
    مقالك أعاد لى بعض الثقة فى العمل الفنى والفكرة
    كل من قدم نقدا فى هذا المسلسل فكان يرى كل المساؤىء بسبب أداء البطلة المفتعل
    فهى لا بنت مصرية ولا بنت تريد الزواج
    إنما هى شخص احمق فقط لا غير (( من خلال الأداء وليس الفكرة ))
    ننتقل للفكرة
    انا مقتنع بالفكرة والمسلسل صراحة (( ما عدا هند ))
    وأكثر ما أعجبنى فى كلماتك جملة
    ((
    لكن الناس مبقاش عندها ايمان بالقدر
    النااااااااااس
    هي ي المشكلة الحقيقية .. ان الناس مفيش وراها حاجة غير الكلام .. الكلام المُحبط
    ))
    أحاول منذ دهر إيصال هذه الكلمة للناس ولكن بشكل آخر
    (( الناس بتقول إنها مسلمة او مؤمنه بالله
    لكن كل الناس تسمع عن ربنا
    نفسى أشوف حد عارفه بجد
    متيقن بوجود الله
    عنده إيمان حقيقى بالله
    واثق فى إن رزقه مش هيزيد لو ضر زميله فى الشغل ولا هينقص لو صرف شوية فلوس على عياله
    واثق فى ان الخير بإيد ربنا بس
    مش فى النفاق مع الزملاء ولا فى النفاق مع رب العمل

    الإيمان واليقين بوجود الله على حق :)
    )))
    خالص التحية والتقدير والإحترام
    ولنا عودة مع المقال القادم
    شاب فقرى

    ردحذف
  3. هو خلاص كل الشباب بقوا عنيهم زايغه و بيلعبوا بديلهم ؟

    أعتقد إنك بتعممى شويه ، مش كل الشباب وحشين على فكره

    و بعدين ماهو برضه الشباب بيتضغط عليهم عشان يتجوزوا

    بيتقال كلام زى "عايزه أشوفك متجوز قبل ما أموت" مثلا

    ده غير إن فيه شباب عايز يتجوز و مش لاقى فلوس يتجوز بيها

    ياريت تراجعى وجهه نظرك تجاهنا ، البنات مش ملايكه ، ولا الشباب شياطين

    ردحذف
  4. سلمت يداكي :)
    ومحدش من الناس هيدخل يتحاسب معانا في القبر ولا يوم العرض على الرحمن الرحيم

    لذلك ... بكل ثقة
    طظ في الناس طالما كلامهم ونصيحتهم مش منطلقة من فهم سليم للدين

    ردحذف